Әскер азғындықтың ортасына айналып кетті – депутат

Парламент сенатының депутаты Геннадий Шиповских әскери қызметкерлер арасындағы өлім-жітім мәселесіне алаңдаушылық білдіріп, ұсыныс айтты.

Халық қалаулысының пікірінше, әскер азғындықтың ортасына айналған. Сондай-ақ Тоқаевтың тапсырмасы бойынша құрылған комиссия жұмысын сынға алды.

«Әскер азғындықтың ортасына айналып кетті десек те артық болмас. Қой үстіне бозторғай жұмыртқалаған бейбіт заманда қанша жастар қыршындай кетіп жатыр. Аман барып, сау қайтпайды. Қасым-Жомарт Тоқаев жарлық емес әскери қатынастарды жою бойынша комиссия құрған. Менің ойымша, ол комиссия жемісті жұмыс атқармады. Қазақша айтқанда айдағандарыңыз бес ешкі, ысқырықтарыңыз жер жарады. Он екі мүшесі сау баласын әскерге жіберіп, мүгедек күйінде немесе табытын қарсы алу кімге жақсы?!

Егер аймақта сарбаз қайтыс болған немесе мүгедек болып қалған оқиғалар тіркелсе, бөлімшелердің басшылары жауапқа, тіпті сотқа тартылуы тиіс. Сонда ғана бізде тәртіп орнайды», - деді ол.