Әкімдер президентке өрт сөндіру жұмыстары туралы есеп берді

Президент Қасым-Жомарт Тоқаев Алматы қаласы, Шығыс Қазақстан, Ақмола және Қарағанды облыстары әкімдерінің өңірлердегі өрт сөндіру жұмыстары туралы шұғыл баяндамаларын тыңдады. Бұл туралы Ақорданың баспасөз қызметі хабарлады.

«Әкімдер өрт ошақтарын сөндіру жұмысы қарқынды жүргізіліп жатқаны туралы, сондай-ақ табиғи апатқа қарсы таяуда атқарылатын іс-әрекет жоспарлары туралы хабарлады. Бұл іс-шараларға Ұлттық Ұлан мен Қарулы Күштердің бөлімшелері жұмылдырылды. Сонымен қатар Мемлекет басшысына өрт салдарынан болған залалды қалпына келтіру және зардап шеккендерге қажетті көмек көрсету шаралары жөнінде айтылды. Сондай-ақ, әкімдер өз аймақтарының әлеуметтік-экономикалық жағдайы туралы есеп берді» делінген хабарламада.

Президент Үкімет басшысына Төтенше жағдайлар министрлігінің өңірлік бөлімшелерін арнаулы техникамен және басқа да қажетті құрал-жабдықтармен қамтамасыз етуді тапсырды.