Әкежан Қажыгелдин АҚШ Конресіне Құлыбаевқа санкция салуды ұсынды

Қазақстандық бір топ оппозициялық белсенділер бұрынғы президент Нұрсұлтан Назарбаевқа жақын бизнесмендерге санкция салу барысындағы күресте Вашингтонның қолдауын алуға мүдделі.

Бұл туралы Intelligence Online хабарлайды.

Intelligence Online сайтының хабарлауынша, Қазақстанның бұрынғы премьер-министрі Әкежан Қажыгелдин мамырдың екінші аптасында Вашингтонға баруды жоспарлап отыр. Ол экс-президент Нұрсұлтан Назарбаевтың күйеу баласы, газ магнаты Тимур Құлыбаевқа және басқа да қазақстандық кәсіпкерлерге санкция салуға шақырғысы келеді.

Қажыгелдин қазақстандық активтерді қалпына келтіру бастамасының (KIAR) бөлігін қолға алмақшы. Ол Орталық Азияның қаржылық және саяси элитасына тиесілі шетелдік активтерді тергеу жөніндегі маман, британдық тергеуші Стивен Фицджон басқаратын Ventham Consulting фирмасынан көмек алады.

Сонымен қатар, Қажыгелдин Қазақстанның азаматтық қоғам коалициясы – Дөңгелек үстелдің атынан да қатысады. Қазір коалиция Вашингтоннан АҚШ Конгресінде қолдау табуға көмектесетін жаңа лоббист іздеп жатыр, деп жазады газет.

Бұған дейін қоғамның лоббисі Александр Беклес болды, онымен келісім-шарт 2023 жылдың қаңтарында аяқталды.

Испандық инвесторлар: Болат Назарбаев бізді алдады

Басылымның мәліметінше, Қажыгелдин сонымен қатар Scribe Strategies & Advisors компаниясын басқаратын лоббист Джозеф Славикпен байланыста. Славик Қажыгелдиннің 2021 жылдың желтоқсанында Конгресс мүшелерімен кездесуі үшін Вашингтонға соңғы сапарын ұйымдастыруға көмектескен кезде Дөңгелек үстелде Беклеспен бірге жұмыс істеген.

Славик қазір экс-президенттің інісі Болат Назарбаевтың активтерін испандық инвесторлар Нервис Херардо Виллалобос пен Торрес Моран Милагросқа қайтару жұмыстарына жетекшілік етуде. Соңғылары оларды Қазақстанның тұңғыш президентінің інісі алдағанын алға тартады. Славик АҚШ қазынашылығының Шетелдік активтерді бақылау басқармасынан (OFAC) санкция сұрайды.

Лондонда бұрыннан тұрып жатқан Қажыгелдин де оппозиция жетекшісі Болат Әбілов пен қаржыгер Оразалы Ержанов құрған «Қазақстан активтерін қалпына келтіру қоры» немесе «Елге қайтару қоры» деген оппозициялық топтың маңызды байланыстарының бірі.

Сондықтан ол активтерді қалпына келтіру жөніндегі жаңа конференцияның жоспарын талқылау үшін сәуір айының соңында Қазақстаннан Лондонға ұшты.