Қадыров Украинадамын деп өтірік айтты – БАҚ

Шешенстан басшысы Рамзан Қадыров Киев маңында арандатушылық тудыратын видеолар жариялағанымен, соңғы аптада Украина аумағында болған жоқ.

Бұл туралы «Украинская правда» Украина Қауіпсіздік қызметіндегі дереккөздеріне және онлайн-сервистердің деректеріне сілтеме жасап хабарлады.

Наурыздың 13-і күні Қадыров Украинадағы жағдай туралы баяндады деген видео жаппай таралды. Видео Киев маңында түсірілген деген болжам бар.

Сонымен бірге, Украина билігі Қадыровтың Украинада болғанын растамады. Алайда, президент аппараты басшысының кеңесшісі Алексей Арестович Украина қарулы күштері Рамзан Қадыров ел аумағында болса, оның көзін жоюға уәде берді. Арестовичтің сөзіне тез жауап қайтарылды.

Қадыров өзінің Telegram-арнасында:  «Неге «егер» дейді? Видеоны көрмедің бе, әлде есігіңді қағуым керек пе?» деді.

14 наурызда Қадыров Киевтен 25 шақырым жерде орналасқан Гостомельде екенін хабарлады.

Украинаның ішкі істер министрлігінде Қадыровтың Украинаға келген ақпаратын растамады. Министрлік басшысының кеңесшісі Вадим Денисенконың айтуынша, бейнеролик шешендерге ауыр шығын кезінде өздерін ақтау үшін жасалған. Себебі, соғыстың алғашқы күндері Киев түбінде Қадыров гвардиясының едәуір бөлігі жеңіліске ұшырады. Атап айтқанда, оның бір генералы қаза тапты.

Украина қауіпсіздік қызметіндегі дереккөздің хабарлауынша, Қадыров екі телефон нөмірін пайдаланады. Украиналық ұялы байланыс операторларының соңғы 7 күндегі деректері Қадыров нөмірлерінің роуминг арқылы украиналық байланысқа қосылмағанын көрсетеді.

Журналистер қоғамдық онлайн сервис арқылы Қадыровтың телефон нөмірі қай ел мен қалада екенін тексерді. Қызмет нөмірді табуға мүмкіндік беретін сілтеме жасады. Алайда ештеңе таппайды.

«Біз Қадыровқа Telegram мессенджерінде хабарлама қалдырдық. Өзімізді РИА Новости журналисі деп таныстырдық және Қадыровтың айтуынша, ол Украинада және Киев маңында болған күні мақалаға сілтеме қостық» деп жазады басылым.

Қадыров сілтеме бойынша жүрді. Сондықтан басылым оның қозғалысы туралы мәліметтер ала алды. Алынған деректер оның Украинада болмағанын көрсетеді.

Қосымша Қадыровтың келесі геолокациясын анықтады: Ресей Федерациясы, Грозный қаласы.

Демек, Қадыров Украинадамын деп өтірік айтқан. 15 наурызда Қадыровтың өзі бірнеше күн бұрын Украинаға келетінін мәлімдегенімен, Грозныйда болған.