Адвокаттар Шамалғандағы атыс бойынша айыпталушылардың кім екенін айтты

Бір жарым ай бұрын Елбасының туған жері Шамалғанда атыс ашқан жастардың кім екені белгілі болды.

Ulysmedia.kz хабарлауынша, 7 наурыздан бастап полиция қылмыстық іс бойынша ақпаратпен аз бөлісіп отырған. Баспасөз хабарламаларында олар қарулы қақтығысқа қатысушылардың болжамды саны туралы жазып, осы қылмыстық іс бойынша тергеу изоляторында 17 адамның қамауда отырғанын хабарлаған. Бірақ полиция департаменті атыс себептері туралы әлі үнсіз, іс бойынша айыпталушылардың аты-жөні де құпия.

Оқиғаға Нұрбол Назарбаевтың қатысы бар және тергеу изоляторында «Көпшік» атымен белгілі Көпжасаровтың жатқаны туралы инсайдерлік ақпараттан басқа ештеңе анықталмады.

Ал күтпеген жерден ұсталғандардың бірінің адвокаттары хабарласса керек.

«Бірқатар қылмыстық құқық бұзушылықтарды жасады деген күдікпен 1988 жылы туған Нұрғазыұлы Бауыржанға қатысты қылмыстық іс қозғалып жатыр. Бірақ Нұрғазыұлы Бауыржан ешқашан Нұрбол Назарбаевқа қарсы куәлік берген емес» деді адвокаттар.

Сөйтіп, олардың арқасында Шамалғандағы атыс оқиғасы бойынша ұсталған 17 адамның бірінің аты-жөні белгілі болды.

Бауыржан Нұрғазыұлы деген кім?

Бауыржан Нұрғазыұлы атақты адамдардың қатарына жатпайды. Бірақ қарапайым дейін десең, ондай адам емес екенін байқауға болады. Оған дәлел - БАҚ-қа тараған ақпараттар. Ол тек спортшы және үздік футболшы ғана емес, сонымен қатар «БН Қаскелең» футзал клубының президенті. Ол 2017 жылы «Барыс» базары әкімшілігінің өкілі ретінде Алматыдағы әйгілі көтерме сауда орнындағы өртке қатысты БАҚ арқылы түсініктеме берген. Бір жылдан кейін Нұрғазыұлы «Барыс 4» компаниясының директоры болып, көтерме сауданың алдағы модернизациясы туралы айтты.

Алайда Бауыржанның есімі нағыз сенсация тудырды. Қаңтар айында БАҚ Болат Назарбаевтың Қазақстаннан қашып кеткені туралы ақпарат таратқан. Көрші елдің шекарашылары 6 қаңтар күні таңертең Елбасының інісі мен «тағы бес-алты адам» «Ақжол» бақылау-өткізу бекеті арқылы шекараны кесіп өткенін хабарлады. Сонымен бірге Азаттық басылымы Болат Назарбаевтың төлқұжаттарының көшірмелерін жариялады. Онымен бірге Нұрсайын Назарбаев пен Бауыржан Нұрғазыұлы болғаны хабарланған.

Қазір ол уақытша ұстау изоляторында, яғни ол өз еліне оралған. Бірақ қазір бұрынғыдай қамқоршысы жоқ болса керек. Заңгерлердің не себепті Бауыржанның есімін жария еткені белгісіз.