Адвокаттар енді күдіктіге тағылған айыпты БАҚ арқылы теріске шығара алады

Адвокаттар тергеу барысында күдіктіге тағылған айыпты БАҚ құралдары арқылы теріске шығара алады. Бұл туралы мәжілістің баспасөз қызметі хабарлады.

Сотта тараптарға өз мүдделерін қорғауда тең мүмкіндік беру мақсатымен адвокаттарға айыптау актісіне қарама-қарсы құжатты, қорғау актісін сотқа енгізу құқығын беру ұсынылады.

"Сондай-ақ қоғамдық резонанс туғызып, тергеу барысына әсер етудің алдын алу үшін күдіктілердің адвокаттарына бұқаралық ақпарат құралдарында сотқа дейінгі тергеу мәліметтерін жарияламай, теріске шығаруға мүмкіндік беріледі", - делінген хабарламада.

Сондай-ақ адвокаттың рөлі айтарлықтай күшейтіледі.

Адвокат көшірмелерін алуға құқылы құжаттар тізімі кеңейтіледі, адвокаттың тағайындалған сараптама бойынша қосымша және нақтылау сұрақтары дереу сарапшыға жіберіледі, адвокат сараптама нысанымен таныса алады.