«Әділетті Қазақстан — бос сөз емес»: Жоғарғы соттың экс-судьясы Тоқаевқа үндеу жасады

Бұрынғы халық депутаты және Жоғарғы соттың экс-судьясы Бақыт Оразбекова мемлекет басшысын «Әділетті Қазақстан» ұранын бос сөзге айналдырмауға шақырды, деп хабарлайды Orda.kz.

Бақыт Оразбекова сот жүйесіндегі әділетсіздіктің құрбаны болғанын және баспанасынан айырылғанын мәлімдеді. Ол президенттен осы іске араласып, әділдік орнатуын сұрайды.

«Мені тікелей дауыс беру арқылы халық сайлады. Сондықтан бізді халық судьялары деп атайтын. Бүгінде адамдар сот жүйесіне деген сенімін жоғалтты, ал бұл сенімді қайтара алатын жалғыз адам — президент», — дейді Оразбекова.

Оның айтуынша, сот жүйесіне қатысты шағымдар күн санап артып келеді. Атап айтқанда, Қарағанды облыстық сотының төрағасы Ерден Әріповтің әрекеттері дау тудырған. Оны жақында Қарағандыдағы 15-шағынаудан тұрғындары ашық сынға алған болатын.

«Сот тәуелсіз, объективті және заңды болуы тиіс. Егер біз әділет туралы айтатын болсақ, онда әділ соттан бастайық», — деді Бақыт Оразбекова.