Әділет экс-министрі Марат Бекетаев 9 жылға сотталды

Сыбайлас жемқорлыққа қарсы қызмет бұрынғы әділет министрі Марат Бекетаевқа қатысты үкім шыққанын хабарлады, деп жазады Orda.kz.

Бұл туралы Антикордың ресми өкілі Данияр Бекайдаров мәлімдеді.

«Бекетаев мүлкі тәркіленіп, 9 жылға бас бостандығынан айырылды. Экс-министрге қатысты іс алаяқтық, аса ірі көлемдегі ұрлық, сондай-ақ кәсіпкерлік қызметке заңсыз қатысу фактілері бойынша тергелді. Іс „құпия“ деген белгімен жүргізілгендіктен, материалдар толық жарияланбайды», — деді Бекайдаров.

Еске сала кетейік, 2023 жылдың 21 қазанында Антикор бұрынғы әділет министрін қызметтік өкілеттігін асыра пайдаланды деген күдікпен ұстаған болатын. Ведомствоның мәліметінше, Бекетаев «айқын қажетсіз қызметтерді» көрсету үшін жыл сайын шарт жасап, мемлекетке аса ірі көлемде зиян келтірген, әрі аффилиирленген компаниялардың мүддесін қорғаған.

Сондай-ақ, Бекетаев елден шығып кетпек болған сәтінде ұсталды.

Марат Бекетаев 2016–2022 жылдар аралығында Қазақстанның Әділет министрі қызметін атқарды. Ол 2022 жылғы қаңтар оқиғасынан кейін қызметінен кеткен. Экс-министр бірнеше даулы істерімен есте қалды: соның ішінде, ол Қазақстаннан тыс аумақтарда көп жыл бойы жүргізілген сот процестеріне жауапты болған.

Сонымен қатар, Әбіләзовқа қатысты қылмыстық қудалау ісін қадағалаған тұлға ретінде де аты аталған.