«Әдейі өлтірген жоқ ғой»: Атырауда жасөспірім суға итеріп жіберген Мерланның ісі бойынша Тоқаевқа үндеу жолданды

Жоғарғы сыныптың оқушылары Жайық өзеніне итеріп жіберген Мерлан Сананың өлімінде айғақ пен дәлелдің бәрі бар әрі күдікті жасөспірімдер мен ата-аналары қылмысты мойындап тұр. Алайда, іс «Балалар бәрібір кәмелеттік жасқа толмаған, олар сотталмайды» деген желеумен жабылып қалған. Осыған байланысты адвокат Инга Иманбай президент Қасым-Жомарт Тоқаев пен бала құқықтары жөніндегі уәкіл Динара Зәкиеваға ашық үндеу жолдады, деп хабарлайды Orda.kz.

Қайғылы оқиға 2024 жылдың 21 тамыз күні Атырау облысы, Ақжар ауылында болды. 13 жастағы жетінші сынып оқушысы Мерлан Сананы жоғары сынып оқушылары Жайық өзеніне итеріп жіберген. 

Жасөспірімнің анасы оны жоғары сынып оқушылары әдейі суға итеріп жібергеніне сенімді. Оның айтуынша, олар баланың жүзе алмайтынын және көру қабілетінің нашар екенін білген. Заңгер Инга Иманбай істің қылмыстық құрам болмады деген желеумен жабылып қалғанын жеткізді.  

«Осы өлім бойынша қозғалған қылмыстық іс 2025 жылдың 14-сәуірінде қылмыстық құрамның болмауына байланысты жабылып қалды. Тергеушілердің бұл шешімі тек қана заңға емес, адамдыққа да, әділетілікке де сай келмейді.

Бұл жердегі кәмелетке толмады деген сөз заңды өрескел бұрмалау. Оқиғаның кездейсоқ емес екенін дәлелдейтін бірнеше нақты фактілер бар. Біріншіден, қасында болған жасөспірімдердің бейнежазбасы бар, онда олар өзара нақты кімнің итеріп жібергенін айтып, бір-біріне кінә артып отыр. Оған қоса жасөспірімдер хат алмасқанда бәрін ашық мойындаған.  

Бұл ата-аналар да істің қылмыстық іс екенін біле тұра жасырғанын әрі істің заңсыз жабылғанын дәлелдейді», — деді Иманбай.

Сонымен қатар, Инга Иманбай осы істі қайта ашып, сотқа дейін жеткізуді сұрады. Бұған дейін Orda.kz оқиғаның мән-жайын толық жазған еді.