Адам құқықтары жөніндегі уәкіл Мәсімовтің тергеу абақтысындағы жағдайы туралы айтты

Мемлекетке опасыздық жасады және билікті күшпен төңкеруге әрекет жасады деген күдікке ілінген ҚР Ұлттық қауіпсіздік комитетінің бұрынғы төрағасы Кәрім Мәсімов тергеу изоляторындағы жағдайына әлі шағымданған жоқ.

Бұл туралы Қазақстандағы Адам құқықтары жөніндегі уәкіл Эльвира Әзімова Baigenews.kz сайтына мәлімдеді.

Омбудсмен ҰҚК-нің экс-басшысының жағдайы қылмыстық құқық бұзушылық жасады деген күдікке ілінген барлық ұсталғандармен бірдей екенін айтты. Бірақ аздаған айырмашылықтардың бар екенін жоққа шығармады.

«Біздің топтың адамдары тексерді, бұл туралы ақпарат бар, бірақ біздің жұмысымыздың ерекшелігі барлық деректерді ашуға мүмкіндік бермейді. Әзірге ешқандай шағым түскен жоқ, сондықтан мен ешқандай мәлімет айта алмаймын. Камера - бұл жалғыз болсын, бірнеше адамға арналған камера болсын бәрі бір. Бұл әлі де қоғамнан оқшаулау екенін түсіну керек» деді ол.

Ол «бұл жерде артықшылық туралы мәселе жоқ» деп атап өтті.

Мәсімов камерасының артықшылығы

«Ұстау жағдайларының түрлері бар: ішкі істер органдарында орналасқан тергеу изоляторлары, Қылмыстық-атқару жүйесі комитетінің қарамағындағы уақытша ұстау изоляторлары бар, үшіншісі – ҰҚК тергеу изоляторы. Мазмұны жағынан олар аздап ерекшеленеді. Әдетте, ҰҚК-нің тергеу изоляторларында ауыр және аса ауыр қылмыстарды жасайтынын ескерсек, қылмыстық-атқару жүйесінің қарапайым тергеу изоляторларына қарағанда адам саны аз. Бірінде үнемі 20-30 адам, ал екіншісінде екі, үш адам тұратын екі үй-жайды салыстырсақ, олардың қайсысының тозығы молырақ болады? Айырмашылық тек осы болуы мүмкін, бірақ басқа жағдайда – адвокаттарға қолжетімділік, медициналық көмек, тамақ – барлық тұтқындардың жағдайлары бірдей. Мысалы, бір жерде ыстық су болуы мүмкін, бірақ бір жерде ол жоқ. Тіпті ҰҚК-нің тергеу изоляторында да күшейтілген режим болуы мүмкін» деді Эльвира Әзімова.

Еске салсақ, 2022 жылдың 6 қаңтарында ҰҚК ҚР Қылмыстық кодексінің 175-бабы 1-бөлімі бойынша «Мемлекетке опасыздық жасау» бабы бойынша сотқа дейінгі тергеуді бастаған болатын. Сол күні осы қылмысты жасады деген күдікпен ҚР ҰҚК-нің бұрынғы төрағасы Кәрім Мәсімов пен басқа да тұлғалар ұсталып, уақытша ұстау изоляторына қамалды.

10 қаңтарда Марат Осипов пен Дәулет Ерғожин ҰҚК төрағасының орынбасарлары қызметінен босатылды. Одан кейін ҰҚК төрағасының бұрынғы орынбасары – «А» арнайы мақсаттағы қызметінің басшысы Әнуар Садықұлов пен ҰҚК төрағасының бұрынғы орынбасары Дәулет Ерғожиннің ұсталғаны туралы белгілі болды.

Қылмыстық іске «Аса құпия» деген белгі қойылды. Тергеудің басқа мәліметтері жарияланбады.