Адам танымастай өртенген: Таразда балабақша қызметкері айуандықпен өлтірілді

10 қаңтарда таңертең балабақша қызметкері ұлының оқу ақысын төлеу үшін Таразға жолға шығып, қайта оралмады. Оrda.kz тілшісі оқиғаның толық мән-жайын анықтады.

Марқұмның күйеуі әйелінің қоңырауларына жауап бермегеніне алаңдаған. Алдымен ол әйелінің университетке бармағанын анықтады. Осыдан кейін іздестіру жұмыстарына еріктілер қосылды.

Әйелдің  өртенген мәйіті қала шетінде табылды. Алған жарақаттарынан марқұмды анықтау өте қиын болды. Полиция әйелді өлтіруге күдікті ретінде 34 жастағы Жанатас тұрғынын ұстады.

«Жедел-іздестіру шаралары барысында 34 жастағы ер адам құрықталып, уақытша ұстау изоляторына қамалды. Қазіргі таңда барлық қажетті тергеу-оперативтік шаралар жүргізілуде, қылмыстың барлық мән-жайларын анықтауға бағытталған», деп хабарлады Жамбыл облысы полиция департаментінің баспасөз қызметі. 

Orda.kz-ке құқық қорғау органдарындағы дереккөздерінен белгілі болғандай, әйелдің алтын әшекейлері ұрланған, бірақ ұлының оқу ақысын төлеуге алып бара жатқан ақшасы сол күйінде  қалтасында қалған.

Марқұм 22 жылдық педагогикалық тәжірибесі бар, оның 11 жылын «Айгөлек» балабақшасында педагог-модератор болып жұмыс істеген. Әріптестері мен тәрбиеленушілердің ата-аналары оны кәсіби маман ретінде жоғары бағалады.

«Ол бір күн демалыс алып, ұлының оқу ақысын төлеу үшін Таразға бармақшы болды. Түстен кейін мен оған қоңырау шала бастадым, бірақ телефоны өшірулі болды. Әдетте әрдайым телефонға жауап беретін, тіпті демалыс күндері де. Ол педагог ретінде жоғары бағаланатын, сұранысқа ие еді»,   деді Orda.kz тілшісіне балабақша директоры Галина Мороз.

Еске сала кетейік, өткен жылы 12 жасар мектеп оқушысы мен депутаттың күйеуі арасындағы оқиға туралы жазған едік. 55 жастағы педофил сот үкімімен 20 жылға бас бостандығынан айырылды. Бұл іс бойынша мектеп басшылығы, психолог және дәрігерлер де айыпталды, олар заңсыз аборт жасатып, ауыр қылмыс туралы хабарламағаны үшін сотталды.