Ғабит Нұрханұлы: «Олар мафия ғой»

Нұр-Сұлтандағы Көпбейінді медициналық орталықтағы анестезиолог-реаниматолог қызметінен негізсіз босатылған Ғабит Нұрханұлының мәлімдеуінше, оған қоқан-лоққы көрсетілген болып шықты.

Желілерде коронавирустан сақтану жолдары туралы пайдалы ақпарат беріп, қоғамға біліктілігімен танылған Ғабит Нұрханұлы бұған дейін facebook парақшасына өзінің аластатылғанын жариялаған болатын. Сөзінше, есепті қазақша бергендіктен, орталық директорының инфекциялық аурулар бойынша орынбасары Татьяна Цечоевамен сөзге келген. Ақыр соңы «ротация жасаймыз» деген сылтауды алға тартып, графиктерге мүлде қоспағаны белгілі болған. Мәселенің ушыққанын байқаған құқық қорғау органы қызметкерлері хабарласып, мәселені шу шығармай шешіп беретіндерін айтып, жазбаны өшіруді сұрады. Артынша Татьяна Цечоеваның туысы делінген әріптесі Виталий Калина қоңырау шалып, «шулатуды тоқтатпаған жағдайда әңгіме басқаша болады» деп қоқан-лоққы көрсеткен.

«Ротация» деген сылтаумен ұнамаған адамын шығарып, орнына адам алады. Қайта қызыл аймақта көп жүрген адамда иммунитет қалыптасады, егер жаңа адам алып келсе, ол ауырып қалуы мүмкін. Қыркүйек айынан бері бізде бірде-бір медицина қызметкері арасында ауру тіркелмеді. Бәрі – істеп жүрген ескі бригада. Менің жұмысымды бастағаныма 5 ай болды, ең соңғы келгендердің бірімін. Көбіне істеп жүргендерге 7-8 ай болған», – дейді Ғабит Нұрханұлы.

Жұмыс орнындағы басшылықтың өз туысқандарын жұмысқа орналастырғанына, жұмысқа қабылдау барысында тіл, дін, ұлт секілді ерекшеліктерге назар аударғанына, әділетсіздікпен күресуден шаршағанын ашық айтқан Ғабит барлығына қолын бір сілтеп, шетелге көшіп кеткісі келетінін жасырмады.

Қамшы сайтының тілшісімен байланыс орнатқан маманның дауысынан толқулар ашық сезілген.

«Олар мафия ғой, бірақ осыған бола өлтіріп тастамайтын шығар», - деп тұтқаны қоюға асыққан екен Ғабит Нұрханұлы.