Әбіләзовтың сыбайласы Бельгиядан Қазақстанға оралды

«БТА Банкі» АҚ-дағы ұрлық және жымқырылған ақшаны тазалау бойынша тергеліп жатқан Мұхтар Әбіләзовтың тағы бір сыбайласы Қазақстанға оралды.

Антикордың хабарлауынша, БТА банк ісін тергеу аясында 2009 жылдан бері іздеуде жүрген Алексей Богданов күш құрылымдарына өз еркімен берілген. Ол Metropolitan Manageres Corp. оффшорлық компаниясының номиналды өкілі, Беловодск крахмал зауытының басқарма төрағасы және «Маис Агро» ЖШС маманы болған. Департаменттің мәліметінше, бұл  компаниялардың барлығы, банктен 300 миллион теңгеден астам ақшаны жымқыру үшін қылмыстық схемаға қатысқан.

«Жақын туыстары мен күдіктінің адвокаты жүргізген түсіндіру жұмыстарының нәтижесі бойынша Богданов Қазақстанға оралып, тергеуге көмектесуге ниет білдірді»,-  деп атап өтті Антикор.

15 мамырда Алексей Богданов Брюссельден Алматыға ұшты. Ол өз еркімен оралғандықтан, кінәсін толық мойындап, тергеумен ынтымақтасуға ниетті болғандықтан, оның бұлтартпау шарасы қамауға алудан кепілдікке ауыстырылды. Қазір құқық қорғау органдары Богдановпен тергеу амалдарын жүргізіп жатыр.

2023 жылдың шілдесінде Мұхтар Әбіләзовтың ағасы, «BSS» ЖШС-ның номиналды директоры Қуаныш Нұрғазин Қазақстанға өз еркімен оралды. Ол 12 жыл бойы Литвада жасырынған. 2024 жылдың наурыз айында Нұрғазин ақша жымқыру және ақшаны жылыстату бойынша кінәлі деп танылды, бірақ істің ескіру мерзіміне байланысты жазадан босатылды.