Ғабидолла Әбдірахымов Мәдениет және спорт вице-министрі болып тағайындалды

Ғабидолла Әбдірахымов Мәдениет және спорт вице-министрі болып тағайындалды, деп хабарлайды Қазақстан Республикасы Премьер-Министрінің сайты.

2019 жылдың қараша айынан бастап қазіргі уақытқа дейін ол Қазақстан Республикасы Премьер-Министрінің кеңесшісі қызметін атқарды.

«Қазақстан Республикасы үкіметінің қаулысымен Әбдірахымов Ғабидолла Рахматоллаұлы Қазақстан Республикасының мәдениет және спорт вице-министрі қызметіне тағайындалды», - делінген хабарламада.

Ғабидолла Әбдірахымов 1975 жылы дүниеге келген. Қазақ мемлекеттік аграрлық университетін бітіріп, «Болашақ» бағдарламасы бойынша Германияның жоғары мемлекеттік басқару мектебінде оқыған. Ол мемлекеттік басқару магистрі.

Әр жылдары Мемлекеттік қызмет істері агенттігін, Бәсекелестікті қорғау агенттігін басқарды. Ол Президент Әкімшілігі Басшысының орынбасары, Премьер-Министр Кеңсесінің Басшысы, «Нұр Отан» партиясының хатшысы қызметтерін атқарды.

2015-2017 жылдары, сондай-ақ 2018-2019 жылдары Шымкент қаласының әкімі болып жұмыс істеді.

30 шілдеде Ғабидолла Әбдірахымов әкім қызметінен босатылған.