Абай облысының мұғалімдері зағиптарға арналған электронды нұсқаулық әзірледі

Абай облысы, Аягөз ауданының мұғалімдері көру қабілеті нашар жандардың өмір сүру сапасын жақсартуға арналған өнім жасап шығарды. Құрылғы «Электрондық өткізгіш» деп аталады.

Бұл көру қабілеті нашар  адамдарға күнделікті қозғалуға көмектесетін инновациялық құрылғы. Ол күнделікті өмірде қауіпсіз қозғалыс пен өзіне сенімділікті қамтамасыз етеді және әртүрлі жарақаттардың алдын алады.

Таяқшадағы сенсор пайдаланушының жолындағы кедергілерді алдын ала анықтап, онымен соқтығысуға жол бермейді. Заманауи құрылғыда кірістірілген арнайы дыбыстық сенсор, сондай-ақ мобильді қосымшалар,  аудио нұсқауларды қолдану сияқты басқа мүмкіндіктер де бар.

Ол сонымен қатар қоршаған ортадағы әртүрлі нысандарды және басқа да маңызды бөлшектерді анықтауға көмектесетін компьютерлік көру технологиясын ұсынады. Сондай-ақ оның басқа құрылғылармен қосылу және өзара әрекеттесу мүмкіндігі бар.

Жоба авторлары: информатика пәнінің мұғалімдері Алтынай Ибраева, Арайлым Ысқақова, орыс тілі мұғалімі Айжан Қуандықова, математика пәнінің мұғалімі Данияр Нәдірбаев.

Айта кетейік, Аягөздік ұстаздар осы айда өтетін ІТ чемпионатына өз жобаларын дайындауда.