Абай облысындағы «Бақты» бекетінен Қытай шекарасына енді жаяу өтуге болады

Абай облысындағы «Бақты» шекара заставасында Қытаймен шекарадан жаяу өту мүмкіндігі ашылды, деп хабарлайды Orda.kz.       

7 желтоқсанда облыс әкімдігі атап өткендей, бұл саяхатшыларға жағдайды жақсартып, екіжақты байланысты нығайтады және тауар айналымының өсуіне жаңа мүмкіндіктер туғызады деп күтілуде.

«Бақты» бекетіндегі терминалдарды жаңғырту жұмыстары аяқталғанға дейін туристер қолданыстағы заңнамаға сәйкес белгіленген тәртіппен шекарадан өтеді» делінген хабарламада. 

Сондай-ақ жолаушыларға айына бір рет 25 келіге дейін жүк тасымалдауға рұқсат етілген. Айта кетейік, шекарадан халықаралық жолаушылар тасымалына арнайы рұқсаты бар көлікпен ғана өтуге болады.

Бұған дейін Қытай-Қазақстан шекарасында тауарлардың кедендік транзитін декларациялау процесі автоматтандырылғаны хабарланған болатын.