Абай облысындағы ірі табиғи өрт 3,5 мың гектар жерді шарпыған

Үкімет отырысы өтіп, күн тәртібінен тыс Абай облысының Бородулиха ауданындағы ірі табиғи өртті жою мәселесі қаралды.

Өңір әкімі Нұрлан Ұранхаев орман өртінің жағдайы қазіргі таңда ерекше бақылауда, өртті сөндіру үшін жедел штаб жұмылдырылғанын айтты.

Өрт шарпыған аумақтың ауданы 3,5 мың га құрайды. Өртті сөндіруге 201 техника, 8 тікұшақ, 1 өрт сөндіру пойызы және жеке құрамның 852 адамы жұмылдырылған.

Айта кетейік, 277 адам өз бетінше туыстарына эвакуацияланған. Бүгін Бородулиха ауданында төтенше жағдай жарияланады.

«Көріп отырғанымыздай, қауіп өте жоғары. Ең бастысы, елді мекендерге қатер төніп тұрған жоқ. Өрт толық бақылауға алынды. Енді оны оқшаулап, толығымен сөндіру керек. Бұл – әкімдік пен Төтенше жағдайлар және Экология министрліктерінің ортақ міндеті» деді Смайылов.