Абай облысында жаңа шекаралық аумақ пайда болады

90-жылдары тозығы шыққан Мақаншы ауылы қалпына келтіріле бастады. Елді мекен Қытаймен шекаралас орналасқан жаңа аудан орталығына айналады, деп хабарлайды 24kz.

«Шекаралас облыстардың тағдыры халықты алаңдататын мәселелердің біріне айналды. Осыған байланысты президент Абай облысының Мақаншы ауданын қалпына келтіру туралы шешім қабылдағанын хабарлады. Бұл бастама «Естуші мемлекет» тұжырымдамасы аясында жүзеге асып жатыр деп сеніммен айта аламыз», - деді облыс әкімі Абай Нұрлан Ұранхаев.

Осы орайда шекаралас аймақтардың көршілес мемлекеттерге жақын орналасуына байланысты ерекше маңыздылығы атап өтілді.

«Бұл аймақтар біз үшін өте маңызды. Олар шекаралық аумақ. Олар арқылы біз шет мемлекеттермен шекараласамыз. Әрине, ұялы байланыстан бастап, жалпы мектептер мен ауруханаларға дейін толық инфрақұрылым болуы керек. Яғни, бұл жер қаңырап бос қалмай, халық қоныстануы керек», – деді ҚР Парламенті Мәжілісінің депутаты Самат Нұртаза.

Халық қалаулыларының айтуынша, орталығы қалпына келтірілген Мақаншы ауылы болатын ауданға мәртебенің қайтарылуы ауыл тұрғындарының жағдайын жақсартып, өзекті мәселелерін шешуге мүмкіндік береді.

Аймақтың экономикасы да жақсарады деп күтілуде. Қазақстан Республикасының ауылдық аумақтарын дамытудың 2023-2027 жылдарға арналған тұжырымдамасына өзгерістер мен толықтырулар енгізетін Үкімет қаулысының жобасында шекаралық аймақтарды дамыту туралы айтылған. Бұл туралы 2 маусымда Ұлттық экономика министрлігінде хабарлады.