Абай облысында сотталғандардан ақша бопсалағандар жазаларын алды

Абай облысындағы колониялардың бірінде сотталғандар құрған ұйымдасқан қылмыстық топ әшкереленді,  деп хабарлайды Orda.kz.       

2021 жылдан 2024 жылға дейін түрме ішінде қылмыстық топ өзге сотталғандардан күш көрсету және қорқыту арқылы жүйелі түрде ірі көлемде ақша бопсалап отырған. Қылмыстық іс бойынша оларға қосыша жаза мерзімі тағайындалды.

Бұл атышулы іске қатысты сот үкімі шықты: колонияда екі қайталама қылмыскер ұйымдастырған мафиялық құрылым әрекет еткен. 2019 жылы сотталғандар қылмыстық топты тікелей түрме ішінде құрған. Кейін оларға тағы жеті сыбайлас қосылып, әрқайсысына нақты рөл берілген.

Үш жыл бойы олар алдын ала ойластырылған сызба бойынша басқа сотталғандардан үнемі ірі көлемде ақша бопсалап келген, бұл үшін қорқыту мен күш те қолданған.

Прокурор барлық айыпталушыға қатаң жаза тағайындауды талап етті. Жәбірленушілер, керісінше, соттан келтірілген шығын толық өтелгенін ескеруді және айыпталушыларға ең аз жаза тағайындауды сұрады. Айыпталушылар кінәсін мойындап, жасаған ісіне өкініш білдірді және материалдық шығынды өтеді.

«Сот үкімімен сегіз айыпталушы кінәлі деп танылып, әрқайсысына 8 жыл 5 айдан 16 жылға дейінгі мерзімге бас бостандығынан айыру жазасы тағайындалды»,  деп хабарлады сот. 

Топ ұйымдастырушыларының бірі сот үкімі шықпай тұрып қайтыс болғандықтан, оған жаза тағайындалған жоқ. Қалған сотталғандар жазасын қатаң режимдегі колонияларда өтейтін болды. Сот олардың әрекетін қауіпті әрі қайталанған қылмыс деп таныды. Үкім заңды күшіне енді.