Абай облысында қоластындағыларға айырсадақ атқан полиция басшысы орнын босатты

Абай облысында полиция бөлімінің басшысы қарамағындағы қызметкерлерге тәрбие беру мақсатында айырсадақ қолданғаны үшін қызметінен шеттетілді, деп хабарлайды Orda.kz.

Оның қызметтен босатылғаны туралы Buzyq telegram-арнасы жазды. Әлеуметтік желілерде тараған видеода подполковник шеніндегі полицейдің қоластындағыларға қарсы айырсадақтан оқ атып жатқаны көрінеді.

«Ол осылайша бағыныштыларын «тәрбиелейді». Адам абыройын аяққа таптап, мұны ләззатанып істейді», – деді полицейлердің бірі.

Оқиғаға қатысты Абай облыстық полиция департаменті түсініктеме берді. Ведомствоның мәліметінше, қызметтік тексеріс басталған.

«Абай облысы полиция департаментінің жеке құрам инспекциясы оқиға орнына барып, қызметтік тергеп-тексеру тағайындады. Оның нәтижесі бойынша қолданыстағы заңнама аясында шешім қабылданады. Тәртіп пен заңдылықты сақтау – департамент басшылығының тұрақты бақылауында», деп хабарлады Абай облыстық полиция департаменті.