Абаев: Сирияда 30-дан астам қазақстандық бар, 10 адам тұтқында отыр

Сириядағы топ ішінде 30-дан астам қазақстандық бар, тағы 10 адам тұтқындар лагерінде отыр, деген мәлімет берді РИА Новостиге Қазақстанның Ресейдегі елшісі Дәурен Абаев.

«Сириядағы 30-дан астам қазақстандықтардың көпшілігі өз еліне оралуға ниетті емес. Кейбіреулері Сирия азаматтығын алып, сонда тұрақты тұруды жоспарлап отыр. Сонымен қатар, Сириядағы күрд жасақтары бақылауындағы «әл-Хол» және «Родж» лагерьлерінде 10-нан астам отандасымыз бар, олардың да өз Отанына оралатын ниеті жоқ», - деді елші. 

Ол сондай-ақ, Қазақстанның Сирияға кеткендердің оралуына алаңдауға негіз жоғын, бұл мәселе қазақстандық арнайы қызметтің ерекше бақылауында екенін атап өтті.

«Сириядағы соғысқа кеткендердің елге оралуына байланысты алаңдауға негіз жоқ... Бұл мәселе Сириядан азаматтарымызды бақылау, қайтару және экстрадициялау бойынша практикалық тәжірибесі мол қазақстандық арнайы қызметтің ерекше бақылауында, сондықтан Қазақстанға оралғандардың деструктивті әрекеттеріне қатысты алаңдаушылық жоқ», - деді Дәурен Абаев. 

Оның сөзіне қарағанда, олардың Сириядан оралуы – оқшауланған жағдайда және олар биліктің бақылауында. Атап айтқанда, ол 2019-2021 жылдары Қазақстан «Жусан» арнайы гуманитарлық операциясын өткізгенін, оның халықаралық тұрғыда оң баға алғанын еске салды.

«Нәтижесінде 607 азаматымыз, оның ішінде әйелдер мен кәмелетке толмағандар елге өз бетінше оралды. Елге келгеннен кейін лаңкестік әрекеттерге қатысқаны немесе терроризмді насихаттағаны үшін 53 адам қылмыстық жауапкершілікке тартылып, әртүрлі мерзімге бас бостандығынан айырылды. Қылмыстық іс қозғауға негізі болмаған қалғандары оңалту шараларынан өтті», - деді елші.