Ақжарқын Тұрлыбайдың Қытайға сапарын ұйымдастырған нигериялық азамат ұсталды

2015 жылы Қытайда есірткі контрабандасымен айналысты деген айыппен өмір бойына бас бостандығынан айрылған қазақстандық Ақжарқын Тұрлыбайдың адвокаты оның сапарын ұйымдастырған Джонни есімді азаматтың ұсталғанын мәлімдеді.

«Алдын ала мәлімет бойынша, 2014 жылы Ақжарқын Тұрлыбайдың Қытайға сапарын ұйымдастырды деген күдікке ілінген «Джонни» деген лақап аты бар Нигерия азаматы Адиндо Нонсо Фортун шет мемлекеттің аумағында ұсталды» деді адвокат Сұңқар Нұрмағамбетов.

2015 жылы ҚР Ішкі істер министрлігі Нигериялық азаматқа қатысты қылмыстық іс қозғаған. Нұрмағамбетов толық ақпарат алу үшін ҚР Ішкі істер министрлігіне адвокаттық сауал жолдаған.

Еске салсақ, қазақстандық студент Ақжарқын Тұрлыбай Қытайдың Гуанчжоу қаласы әуежайында 2014 жылдың наурыз айында ұсталды. Таныстарының айтуынша, ол Алматыдан Қытайға аттанған. Сол кезде белгісіз азаматтар бойжеткенге Гуанчжоудан Малайзияға бренд киімдерін тасымалдауға ұсыныс жасап, сол үшін қомақты қаражат төлейміз деп уәде берген. Ақжарқын Гуанчжоу әуежайында ұсталған. Оның сөмкесінен есірткі табылды. Ақжарқын есірткі туралы мүлде білмейтінін алға тартты.

Ол кезде Нигериялық есірткі трафигін ұйымдастырушылар әлі ұсталмаған болатын.

2015 жылдың маусымында Гуандун соты Қазақстан азаматшасын өмір бойына бас бостандығынан айырды. 2018 жылы сот істі қайта қарауға жіберді. Алайда кейінірек оны өмір бойына бас бостандығынан айыру жазасы туралы сот үкімі өзгеріссіз қалды. Аппеляциялық инстанция 2020 жылдың тамыз айында Ақжарқын Тұрлыбайдың үкімін тағы да өзгеріссіз қалдырды.