Ақын Шөмішбай Сариев қайтыс болды

Қазақстанның еңбек сіңірген қайраткері, ақын Шөмішбай Сариев 75 жасқа қараған шағында бақилық болды, деп хабарлады Мәдениет және спорт министрлігінің баспасөз қызметі.

Шөмішбай Сариев 1946 жылы 15 сәуірде Қызылорда облысы, Арал ауданы, Шөміш станциясында дүниеге келген. Еңбек жолын Қазалы аудандық «Ленин туы», Арал аудандық «Толқын» газеттерінен бастаған ақын, «Қазақстан» баспасының редакторы, «Жұлдыз» журналында бөлім меңгерушісі, Қазақстан Республикасы Ұлттық ғылым академиясы Мұхтар Әуезов атындағы Әдебиет және өнер институтының ғылыми, аға ғылыми қызметкері болған.

1971 жылы ҚазМУ-дің журналистика факультетін бітірген.

Алғашқы жыр жинағы 1974 жылы «Балдәурен» деген атпен жарық көрген.

1994 жылы «Жазушы» баспасынан таңдамалы өлеңдер томдығы, 1992 жылы «Сүйінші» деген атпен ән өлеңдері жеке жинақ боп басылған.

1996 жылы «Қазіргі қазақ лирикасының ізденістері» атты тақырыпта ғылым кандидаты дәрежесін иеленді.

«XX ғасырдың жиырмасыншы жылдардағы поэзиясы» атты монография жазған.

Г. Гулиа, О. Берггольц, И. Абашидзе, С. Викулов, А. Дементьев, Ф. Алиева, Р. Рождественский, М. Эминеску, т.б. ақындардың өлеңдерін қазақ тіліне аударған.

Содан бергі аралықта қазақ, орыс тілдерінде он бес шақты кітабы шықты. 1994 жылы «Жазушы» баспасынан таңдамалы өлеңдер томдығы, 1992 жылы «Сүйінші» деген атпен ән өлеңдері жеке жинақ боп басылған. «Тарлан» сыйлығының иегері. Қазақстанның еңбек сіңірген қайраткері.

Қазіргі уақытқа дейін М. Әуезов атындағы Әдебиет және өнер институтында ғылыми қызметкер болды.