Ақтаулық спортшы тоғызқұмалақтан Азия чемпионы атанды

Ақтөбеде өткен 5-ші Азия чемпионатында ақтаулық Жұмакелді Тұрақбай алтыннан алқа тағып, ел абыройын асқақтатты. Жарыстар 6-14 желтоқсан аралығында өтті.

Бұл жарыста Ресей, Түркия, Қытай, Түркіменстан, Моңғолия, Өзбекстан, Үндістан, Қырғызстан, Әзірбайжан, Ауғанстан және Қазақстаннан келген 200-ден астам спортшы бақ сынады.

Жұмакелді Азия жарыстарында ел намысын қорғап, бұған дейін «блиц» бойынша Қазақстан чемпионы атанған болатын.

– Маңғыстау құрамасының бес мүшесі қатысты, бірақ рапид санатында ешкім жеңіске жете алмады. Жұмакелді блиц және классикалық санаттағы жеті кезеңнің барлығында жеңіске жетіп, Азия чемпионы атағын жеңіп алды, - дейді тоғызқұмалақтан Маңғыстау облысының аға жаттықтырушысы Гауһар Жәкиева.

Жұмакелді Тұрақбай тоғызқұмалақпен тоғыз жасынан айналысқан. Жас спортшы 12 жасында республикалық және халықаралық жарыстарда алғашқы елеулі табыстарға қол жеткізді.