Ақтауда жүргізуші жаяу жүргіншілер өткелінде келіншек пен баласын қағып кетті

Ақтауда Toyota Land Cruiser жүргізушісі жаяу жүргіншілер өткелінде жолдан өтіп бара жатқан келіншек пен баласын қағып өлтірді.

Лада басылымының хабарлауынша, қайғылы оқиға 20 желтоқсанда 16-19-шы ықшамаудандар арасында болған. Полицейлер диспетчерлік қызметке қоңырау кешкі сағат 23:45-те түскенін айтты.

«Toyota Land Cruiser жүргізушісі жаяу жүргіншілер өткелінде жолды кесіп өтіп бара жатқан жаяу жүргіншілерді қағып кетті. Салдарынан 29 жастағы әйел алған жарақаттарынан оқиға орнында көз жұмды» деп хабарлады облыстық полиция департаменті.

Бес жасар қыз Маңғыстау облыстық балалар ауруханасына жеткізілген, бірақ ол да есін жимастан көз жұмды.

Аталған факті сотқа дейінгі тергеп-тексерудің бірыңғай тізіліміне Қылмыстық кодекстің 345-бабы бойынша тіркелді.

Құқық қорғаушылар тергеу жүріп жатқанын айтты. Сот-медициналық сараптама тағайындалды. Жүргізуші уақытша ұстау изоляторына қамалды.