Ақтауда «ГАЗель» көлігінен 186 келі есірткі табылды

Маңғыстау облыстық Есірткі қылмысына қарсы күрес департаментінің қызметкерлері «ГАЗель» көлігіне есірткі тиеп бара жатқан әйел мен екі ер адамды ұстады.

Оқиға Ақтау индустриалды аймағында болған.

 «Автокөлікті тінту кезінде 8 картон қорап табылды, оның ішіне 185,98 келі марихуана салынған. Зат одан әрі сату мақсатында  оңтүстік облыстардан Маңғыстау облысының аумағына әкелінген» деп хабарлады ПД баспасөз қызметі.

Оқиғаға байланысты 38 жастағы әйелге, сондай-ақ 28 және 31 жастағы екі ер адамға айып тағылды.

Аталған факті Қазақстан Республикасы Қылмыстық кодексінің 296-бабының 4-бөлігі – Есірткі құралдарын аса ірі мөлшерде заңсыз дайындау, қайта өңдеу, иемдену, сақтау, тасымалдау бойынша тіркелді. Бұл қылмыс үш жылдан жеті жылға дейінгі мерзімге бас бостандығынан айырумен жазаланады.

Ұсталғандар уақытша ұстау изоляторына қамалды.