Ақтау әуежайын ҰҚК шекара қызметі күзетеді

Қауіпсіздік күштері паспорттық бақылау  мен  бақылау-өткізу пунктіне жұмылдырылған.

Ұлттық қауіпсіздік комитетінің Шекара қызметі Ақтау халықаралық әуежайын күзету жауапкершілігін өз мойнына алды.

Ақтау халықаралық әуежайының бас директоры міндетін атқарушы Меруерт Жолдыбаеваның айтуынша  басшылық әуежай стратегиялық нысан болғандықтан қауіпсіздік шараларын күшейту туралы шешім қабылдаған.

Қазіргі уақытта Ақтау әуежайында Арнайы мақсаттағы мобильді операциялар басқармасының (АММОБ) арнайы дайындалған қызметкерлері жұмыс істеуде. Олар аумақтағы нысандар мен адамдарды қорғайды.

«ҰҚК Шекара қызметінің Маңғыстау облысы бойынша департаменті Арнайы мақсаттағы жылжымалы іс-қимыл басқармасының жеке құрамы Ақтау әуежайындағы мемлекеттік маңызы бар нысанды күзетумен қатар, жергілікті тұрғындардың қауіпсіздігін қамтамасыз етуде» деді ведомство басшысы. Бұл туралы АММОБ  басшысы Мереке Аймағанбетовке сілтеме жасап аймақтық Lada басылымы хабарлады.

Арнайы мақсаттағы жылжымалы іс-қимыл басқармасы қызметкерлері төлқұжаттық бақылауға, бақылау-өткізу пунктіне, сондай-ақ Қазаэронавигация мұнарасына жұмылдырылған.

Еске салайық, 4-7 қаңтар аралығында Ақтау әуежайы төтенше жағдайға байланысты рейстерді тоқтатқан болатын. Ғимаратта әуежай қызметкерлері болған. Тоқтатылған рейстердің жолаушылары әуежай қонақүйіне орналастырылды.