Қаңтардағы оқиғалар бойынша 546 қылмыстық іс тергелуде

Қазақстанның құқық қорғау органдары қаңтар оқиғасы фактілері бойынша 546 қылмыстық істі тергеп жатыр.

Құқық қорғау органдары қаңтар оқиғасы фактілері бойынша 546 қылмыстық істі тергеп жатыр, деп хабарлады ҚР Бас прокуратурасы қылмыстық қудалау қызметінің басшысы Серік Шалабаев.

— Бүгінде тергеу-жедел тобы 546 қылмыстық істі тергеп жатыр, оның ішінде 44-і терроризм актісі, 34-і жаппай тәртіпсіздік, 15-і кісі өлтіру. Қылмыс жасады деген 672 күдікті уақытша ұстау изоляторына қамалды, оның 446-сы сот қаулысымен қамауға алынды. Прокуратура құжаттарын тексеріп, қамауға алуға негіз болмағандықтан 100-ге жуық адам босатылды, - деді Шалабаев сенбі күні өткен брифингте.

Оның айтуынша, Бас прокуратураға құқық қорғау органдары қызметкерлерінің әрекетіне қатысты 32 өтініш түскен. Шалабаев құқықтары бұзылды деп есептейтін барлық азаматтарды Бас прокуратураның немесе аумақтық прокуратуралардың байланыс орталығына хабарласуға шақырды.