Қаңтар оқиғасында ауыр қылмыс жасамағандарды босату керек – депутат

Мәжілісте «Ақ жол» фракциясының депутаты Берік Дүйсембинов қаңтардағы тәртіпсіздік кезінде ауыр қылмыс жасамаған адамдарды тергеу абақтысынан босатуды талап етті.

– 4-5 ақпанда Мәжіліс депутаттары Қазақстан Республикасы Қылмыстық-атқару кодексінің 32-бабына сәйкес қаңтардағы қайғылы оқиға кезінде тергеу изоляторларында ұсталған азаматтарға барды, сондай-ақ олардың туыстарымен кездесті. Бізге қамауға алынғандардың ісін әділетті түрде қарап, жазықсыздарды босату туралы 70-тен астам өтініш түсті. Сонымен қатар, телефоным әлеуметтік желілерде жарияланғаннан кейін маған күн сайын осындай ондаған өтініштер түсіп жатыр, - деді Дүйсембинов сәрсенбі күні өткен мәжіліс отырысында.

Оның айтуынша, ұсталғандардың кейбірі содырлар қару қолданып, оларды көпшілікке қосылуға мәжбүрлегенін айтады.

– Ұсталғандардың кейбірі көпшіліктің ықпалымен заң бұзғанын, дүкендерді талқандағанын, киім-кешек немесе телефон ұрлағанын мойындайды. Бүгінде олардың көпшілігі тәубе етіп, арандатушылыққа ұшырағанын түсінеді. Кейбіреулер жан түршігерлік қылмыстар мен адам өлтіру басталғанда үйіне кетуге әрекеттенгенін, бірақ белгісіз содырлар оларды қарумен қорқытып, кетуге мүмкіндік бермей, тәртіпсіздіктерге қатысуға мәжбүрлегенін айтады. Біз изоляторларда радикалды ағым өкілдерін де көрдік. Тұрғын үйлердің терезелеріне пулеметтен оқ ату, мемлекеттік мекемелерді басып алу, қызметкерлердің шабуылдары мен үрейі туралы бейнежазбалар көпшілік назарында. Мұндай фактілер мен материалдармен, әрине, тергеу айналысуы керек, - деп атап өтті депутат.

Депутат бейбіт тұрғындарды экстремистер мен қарақшылардан ажырату қаншалықты маңызды екенін айтты.

– Қазір қалыптасқан жағдайдан шығу, бейбіт тұрғындарды экстремистерден, қанішерлер мен қарақшылардан ажырату үшін біз туыстарының арыз-шағымдары бойынша жұмыс істейтін парламенттік комиссия құруды (Мәжіліс және Сенат депутаттарының, барлық фракциялардың қатысуымен) ұсынамыз, - деп қосты Дүйсембинов.