Қаңтар оқиғасында қамалғандардың әлі   669-ы абақтыда

Бұл адамдар Қанды қаңтар оқиғасынан кейін ұсталып, уақытша ұстау изоляторында отыр, деп хабарлады ҚР Бас прокуроры.

Бүгінге дейін тергеу изоляторында 669 адам отыр, деп хабарлады еліміздің бас прокуроры Берік Асылов. Оның айтуынша, ұсталған 56 адамның дене жарақаттары бар. Төрт адам жарақатына байланысты емделіп жатыр. Қалғандары медициналық көмекке мұқтаж емес. Бас прокурор ұсталғандардың қандай жағдайда жарақат алғанын ашып айтпайды.

Кәмелетке толмаған екі азамат қамауда қалды, деп хабарлайды Асылов. Олар ауыр қылмыс жасады деген күдікке ілінгені белгілі.

Бұлтартпау шарасы өзгертілгеннен кейін 328 адам тергеу изоляторынан босатылды. Бұл адамдарға сот қандай шектеу таңдағаны да айтылмады.

Халық арасында қанды деп аталып кеткен қаңтардың басындағы оқиғадан кейін Қазақстан қалаларында жаппай тұтқындаулар болды. Белгілі болғандай, тәртіп сақшылары тәртіпсіздіктерге қатысқан адамдарды ғана емес, бейбіт шерулерге қатысушыларды да ұстаған. Ең үлкен наразылықты адамдардың ауруханаларда ұстау фактілері тудырды.

Полицейлер мен күш құрылымдары өкілдері операциядан кейін жаралылар мен адамдарды тікелей палаталардан алып шығып, абақтыларға тоғытқан. Артынша көпшілігі қамауға алынды. Кейбірі «Аманат» қоғамдық комиссиясы мүшелерінің араласуынан кейін босатылды.