Қаңтар оқиғасынан кейін ұсталған алты адам қайтыс болды - Бас прокуратура

Мемлекеттік басылым Қаңтар қырғынынан кейін қамауда отырған алты адамның қайтыс болғаны туралы жазды.

Бас прокуратураның арнайы прокурорлар қызметінің бастығы Ризабек Ожаров қайтыс болғандар туралы ақпаратты «Казахстанская правда» газетіне берген сұхбатында айтып берген.

«Жақында ғана біз тергеуге рұқсат етілмеген анықтау әдістерін қолдану фактілері бойынша қылмыстық істерді қабылдадық. Бұрын оларды тергеумен сыбайлас жемқорлыққа қарсы қызмет органдары айналысқан. Бізге мұндай істердің барлығы берілмеді, тек ауыр зардаптар, дәлірек айтқанда, ұсталғандардың өлімі тіркелген жағдайлар бойынша ғана. Біздің мәліметтеріміз бойынша, мұндай жағдайда Алматы УҰИ-да екі адам, Шығыс Қазақстан облысында үш адам және Талдықорғанда бір адам қаза тапқан» деп хабарлады Ризабек Ожаров.

Сондай-ақ, оның айтуынша, қадағалау органы Талдықорған тұрғынына қатысты үтік қолданып азаптау туралы резонанстық істі алған. Әңгіме Қазақстанның бірінші президенті Нұрсұлтан Назарбаевтың ескерткішін бұзуға қатысқан Азамат Батырбаев туралы болып отыр. Арнайы прокурор нақтылағандай, ол әлі де тергеу изоляторында.

«Аталған фактілер бойынша тергеу жалғасуда, істің нәтижелері туралы міндетті түрде хабарлаймыз. Бірақ мұндай қылмыстар жаппай сипатқа ие болған жоқ деп айта аламын» деп сендірді Ожаров.