Қаңтар оқиғасы: Түрік әуе жолдары басшысы қызметінен босатылды

Түрік әуе жолдарының басшысы Алматыда тәртіпсіздіктер кезінде экипажды тастап кеткені үшін қызметінен айрылды.

Türk Hava Yolları компаниясының бас директоры Илкер Айчи қанды қаңтарда қызметкерлерін Алматыда қалдырып, Түркияға оралғаны үшін қызметінен босатылды.

Қаңтар айының басындағы тәртіпсіздіктер кезінде Türk Hava Yolları (THY) директорлар кеңесінің төрағасы Илкер Айчи мен оның жұбайы Тугче Саатман Айчи Қазақстанда болды. Олар 7 қаңтарда әуе компаниясының қызметкерлерін осында қалдырып, THY жүк ұшағымен Түркияға оралды. Алматыдан THY қызметкерлерін, жеке әуе тасымалдаушыларының кейбір қызметкерлерін және Түркия азаматтарын эвакуациялаған ұшақ 11 қаңтарға дейін келген жоқ.

Айчидің ұжымнан кетіп, әйелімен Түркияға оралды деген ақпарат отандастарының сынына ұшырады. 28 қаңтарда оның отставкаға кеткені белгілі болды.

Түрік ақпарат құралдары Айчидің Қазақстанға бизнесмендердің өтінішімен келгенін, жарты іссапар, жарты демалыс болғанын жазады.

— Қазақстан – тату ел. Өзімді әрқашан қауіпсіз сезінетін ел. Біз сонда болғанымызда олар қауіпсіздік шараларын соңына дейін сақтады. Сәрсенбі күні таңертең қайтып келуге дайындалып жатқанда, біз «жолда бірдеңе дұрыс емес» дегенді естідік. Сол түні тәртіпсіздіктер басталып, жағдай ушыға түсті. Әуежайға шабуыл жасалды, - деді Айчи.

THY бұрынғы төрағасының айтуынша, Түркия билігімен және қазақстандықтармен келіссөздер жүргізілген. Айчиді Түркияға қайтаруды сұрады, өйткені оның Қазақстанда болуы туралы хабар сағат сайын қыза түскен.

— Олар: «Біз сені қазір жібереміз,  команданы кейінірек жөнелтеміз. Сіздің ол жақта болғаныңыз жаңалықтарға қосымша болып жатыр» деді. Маған команда кейінірек келеді деп уәде берді. Жүк ұшағында төрт орын болды. Мен еліме тезірек оралдым, - деді Айчи.

Ашық ақпарат көздерінен алынған мәліметтерге қарағанда, Илкер Айчи бұған дейін Түркия президенті Режеп Тайып Ердоғанның кеңесшісі болған.

Еске салсақ, Қазақстанда толқулар басталған кезде көптеген шет елдер, соның ішінде Түркия да Қазақстанға рейстерді тоқтатқан болатын.