Қаңтар оқиғасы кезінде бүлінген Ақтөбе әкімдігінің ғимараты аңғал-саңғал күйде тұр

Ақтөбе облысының әкімдігі қаңтардағы тәртіпсіздік кезінде қираған есіктерін жамап қойған. Әкімдіктің сынған мүліктері әлі үңірейген күйінде тұр.

Ақтөбе облысының әкімдігі қаңтар оқиғасы кезінде бүлінген мүліктердің нақты шығынын атады. Қаңтардағы тәртіпсіздіктерден кейін штаттық режимде жұмыс істеуді тоқтатпаған әкімдік бүлінген мүлік шығынын асықпай есептегенге ұқсайды.

Бүгін Ақтөбе облысы қаржы басқармасының басшысы Нұрлыбек Өнербаев БАҚ өкілдеріне нақты шығын 229, 16 млн теңге екенін айтты.  Оның ішінде жөндеу жұмыстары үшін 155 млн теңге, бейне бақылау жүйесін жөндеу, күзет дабылдарын қалпына келтіру және жиһаздарды жөндеуге 37,6 млн теңге,  қалған қаржы ұйымдастыру, техникалық жабдықтарды сатып алуға жоспарланған.

«Қазіргі уақытта жергілікті атқарушы орган резервінен 215 млн теңге қарастырылды.  Іс басқармасы мердігер компаниялармен келісімшартқа отырып, жұмыстар басталып кетті. Жұмыстар сәуір айында аяқталады» дейді Нұрлыбек Өнербаев.

Қаңтар оқиғасы кезінде Ақтөбеде көшені, бизнес орталықтарын тонау фактілері тіркелген жоқ.

Айта кетейік,  2 қаңтарда Жаңаөзенде халық сұйытылған газ бағасының 60 теңгеден 120 теңгеге көтерілгеніне қарсы шықты. Кейін Жаңаөзендегі наразылықты елдің басқа аймақтары қолдады. Халық елдегі қымбатшылықты айтып, үкіметке талап қойды. Кейін үкімет құрамы жаңартылып, бірқатар шенеуніктер қызметтен кетті.

Авторы: Ардақ Ерубаева, Ақтөбе