Ақтөбелік тұрғынның үйі төрт күннен бері су астында тұр

Ақтөбелік Жұматай Әкімовтың  жалғыз баспанасы су астында тұр. Үйдің ішіне кірсеңіз, үрей билейді. Төрт күннен бері су астында тұрған баспананың қабырғасы бірнеше жерден жарылып, үгітіліп тұр. Едені опырылып кеткен. Пәтердің ішкі көрінісі көңіл құлазытады. Су бетіне қалқып шыққан ұн өнімдері қамыр болып иленіп жатыр.

«Осы баспанаға үш жыл бұрын қол жеткізіп, көшіп келген едім.   Несие рәсімдеп, үйдегі техниканың бәрін жаңалап алдық. Бәрі су астында қалды. Ішің удай ашиды. Ыдыс-аяқ, киім кешегіміз сумен ағып кетті. Тұрмыстағы қызыма дайындап жатқан сандықтағы жүк іске аспай қалды. Кімнен көмек сұраймыз» дейді төрт баланың әкесі Жұматай Әкімов.

Отбасы қазір уақытша мектеп ішін паналап жүр. Ауласында асырап отырған қояндарын су ағызып кеткен. Қорасындағы он көжегі мен бес қоянынан да айрылған.

«Қашанға дейін мектепте тұрамыз? Жер кепкесін үйімізге жібереді. Ортасына дейін су астында қалған үйіміз құлайын деп тұр. Біз енді қайда барамыз? «Су келе жатыр» деп ешкім ескертпейді. Тек көршілердің WhatsApp чаты шулап қоя берді. Төмендегі үйден бастап кірген. 15 минуттың ішінде бәрін алып кетті. Киімімізді киіп үлгере алмай қалдық» дейді Жұматай Әкімов.

Төтенше жағдай департаментінің мәліметінше, облыста 119 үйді су басқан. Оның 41-і тұрғын үй болса, 78-і бау-бақша. Саманнан салынған бір үйдің қирағаны ресми тіркелді.

«Су тасқыны кезеңі басталғаннан бері 315 адам эвакуацияланды, оның ішінде 138 бала бар.

6 сәуір күні адамдарды уақытша орналастыру пункттерінде 114 адам, оның ішінде 62 бала бар. Басқа тұрғындар үйлеріне оралды» деп хабарлады ТЖД баспасөз қызметі.

Облыста төрт күннен бері үш елді мекенге барар жол қатынасы қалпына келген жоқ.

Авторы: Ардақ Ерубаева, Ақтөбе