Ақтөбелік бес компания Украинаға барған жүк көліктерін шығара алмай қалды

Қазақстандық 50-ден аса жүк көлігі Украина аумағынан шыға алмай тұр. Оның 11-і ақтөбелік бес компанияға тиесілі. Бүгін ақтөбелік кәсіпкерлер «Атамекен» Ұлттық кәсіпкерлік палатасынан Киевтегі қауіпті аймақта қалған қызметкерлерін шығаруға көмек сұрады.

– Украинадағы жүргізушілермен байланысып отырмыз. WhatsApp, Telegram істеп  тұр. Алда қалай болатынын болжаудың өзі мүмкін емес. Біз жүргізушілерді соғыс аумағынан аман алып шығуды сұраймыз. Бір аптадан бері тұрып қалды. Соғыс басталмай кірген еді, – дейді кәсіпкер Берік Жиенқұлов.

Ақтөбеге жете алмай отырған 11 көліктің 9-на жүк тиелген, үшеуі бос.

– Мемлекет қазақстандық тасымалдаушылардың Украина аумағынан шығуы үшін «жасыл дәлізді» қамтамасыз ету жұмыстарын тезірек ұйымдастыруды сұраймыз. Біз шығындар туралы айтып жатқан жоқпыз. Орта есеппен айтқанда бір машинаның құны 100 мың доллар болады. Қазіргі уақытта отандастарымыздың амандығы алаңдатады, – дейді кәсіпкер Рустам Мартасов.

Ал «Атамекен» ҰКП үш күн бұрын министрлікке хат жазылғанын, басқа мемлекеттерден көмек сұралғанын хабарлады.

– 25 ақпанда ҰКП сыртқы істер, сауда министрліктеріне және индустрия және инфрақұрылымдық даму министрлігіне ресейлік, белорустық, украиндық, польшалық және басқа да тараптардан  ету туралы мәселені пысықтау өтінішімен хат жолдады. Қазір жауап күтіп отырмыз, – дейді «Атамекен» ҰКП-ның Ақтөбе облысы бойынша орынбасары Рулан Күйшинов.

Автор: Ардақ Ерубаева