Ақтөбеде су толы арыққа құлаған Назарбаев мектебінің оқушысы өлім аузынан қалды

Ақтөбедегі Назарбаев зияткерлік мектебінің оқушысы сабақтан қайтар жолда суы тасып жатқан арыққа түсіп кетті. Оқушыны еңгезердей сегіз ер адам әрең шығарды. Жасөспірім ішінен жарақат алған.

Оқиға 31 наурыз күні кешкі сағат 18:00-де Ақтөбе қаласы Батыс 2 ауданындағы Мәңгілік ел көшесінде тіркелді. Сабақтан шыққан 15 жастағы жасөспірім жүргіншілер жолағымен келе жатып, арыққа құлаған. Иығына дейін су болған оқушыны жақын маңдағы фитнес орталығының қызметкерлері көріп, шығарып алды.

«Жасөспірім көшеде су толы шұңқырға құлаған. Куәгерлер бірден шығарып, көмектескен. Ішінің жұмсақ терісі көгерген. Ата-анасы ауруханаға жатқызудан бас тартып, үйіне алып кетті» деп хабарлайды облыстық денсаулық сақтау басқармасы.

Балшығы езіліп жатқан аудандағы арыққа құлаған қыздың видеосы әлеуметтік желіде тарап кетті. Жазбадан оны бірнеше ер адамның әрең шығарып алғаны көрінеді. Қыз баланың киімі қатты затқа ілініп қалған болуы мүмкін. Құтқару кезінде оқушы сыртқы киімсіз қалған.

Облыстық білім басқармасының мәліметінше, көмек көрсетушілер қыз баланы жақын жердегі фитнес орталығына кіргізіп, киімін алмастырып, ыстық шай берген. Баланың ата-анасы да, жедел жәрдем қызметкерлері де сол жерге шақырылды.

«Оқушыны ата-анасы үйге алып кетті. Қыздың анасы дәрігер болғандықтан ауруханаға жатудан бас тартқан. Оқушыға тиісті көмек көрсетіледі» деп хабарлайды облыстық білім басқармасы.

Желіде тарап кеткен видео Ақтөбенің әкімдерін аяғынан тік тұрғызды. Жергілікті шенділер адам бойындай арық толы суды  санаулы сағатта ретке келтірді.

Ақтөбе облысы әкімдігінің ресми парақшасында ұрысып, кінәліні іздеп жүрген әкімдердің видеосы да тарап кетті.

«Не болды? Бұрын не ойладыңдар?» деген Актөбе облысының әкімі Оңдасын Оразалиннің сауалына қала басшысы ауданды дала суы басып кеткенін айтып жатыр. Дала суы жылда болады. Былтыр да солай болды. Осының бәрі алды-артын ойламағанның кесірі. Сендер ойнаған екенсіңдер. «Құдайдың құдіретімен ойнамаңдар» деп айттым. Біздің ауылдың сулары бір күнде толып, даланы алып кетеді» деді Ақтөбе облысының әкімі Оңдасын Оразалин қала басшысына.

Қала басшысы Асхат Шахаров арнайы штаб түнімен арнайы техникалар арқылы елді-мекендердегі жағдайды бақылауға алатынын хабарлады.

Ал осы уақытта Ақтөбе облысының Қобда ауданы жарықсыз қалды. Ауылдағы 165 тұрғын үйдің жарығы сөндірілген.

Судың көптігінен қаланың өзінде сабаққа бара алмай жатқан оқушылар бар. Кейбір мектептерде бүгіннен бастап онлайн оқуға көшетіні туралы хабарланып жатыр.

Авторы: Ардақ Ерубаева, Ақтөбе