Ақтөбеде мас еркек ойын алаңынан баланы алып кетпек болды

Ақтөбе тұрғыны бейтаныс адамның ойын алаңынан қызын қалай алып кетпек болғанын айтып берді. Күдікті ер адам әйелдің оны бақылап тұрғанын білмей қалған.

Бұл туралы Orda.kz хабарлады.

Оқиға 9 тамыз күні кешке қаладағы тұрғын үйлердің бірінің ауласында болған.

– Мен екі баламен ойын алаңында болдым. Кенже ұлыммен айналысып жүргенде, шамамен 45-50 шамасындағы мас кісі үлкен қызыма (төрт жаста) жақындады. Қызымның қолын сипап, оған: «Менімен бірге жүр» деген, - деп жазды әйел Instagram-да.

Мұны көрген қыздың анасы еркекке тап беріп, ұрыса бастаған. Ал ер адам баланы шатастырып алғанын және өз баласын іздеп жүргенін алға тартқан.

Осыдан кейін ол көлікке мініп, кетіп қалған. Көлікте тағы бірнеше ер адам отырған. Олар барлығын шеттен бақылаған. Баланың анасы оларды суретке түсіруге қорыққан. Себебі, олар балаларын қағып кетуі мүмкін еді. Кейін жүріп бара жатқан жерінен көлікті түсіріп алған.

Келіншек сол сәтте ойын алаңында балалармен бірге серуендеп жүрген басқа да ер адамдар «ұрыны» ұстауға тырыспағанына налыды.

Ақтөбе облысының Полиция департаменті «көлікті таптық, жүргізуші мен жолаушылар тергеу мақсатында полиция бөлімшесіне жеткізілді» дейді.