Ақтөбеде автоорталықта газ балоны жарылды: бір адам қаза тапты

Ақтөбедегі автокөліктерге техникалық қызмет көрсету орталығында газ балоны жарылып, күзетші қайтыс болды. Оның денесі бес сағаттан кейін ғана арнайы иттердің көмегімен табылды.

Оқиға 22 ақпан күні таңертең орын алған. ТЖД кезекші бөліміне таңғы сағат 04:11-де «Альтаир» жанар-жағармай бекетінің отқа оранғаны туралы ақпарат түскен.

– Ақтөбе қаласы Смағұлов көшесінде орналасқан бекетке өрт сөндірушілер мен құтқарушылар қатар жіберілді. Іздеу-құтқару қызметі 1954 жылы туған күзетшінің денесін тапты.
«Өрт сөндірушілер оқиға орнына жеткенде «Альтаир» техникалық қызмет көрсету стансасында газ қосындысының жарылғаны анықталды. Кейін аумағы 600 шаршы метр болатын ғимарат қирап, ортасында түскен. Техникалық қызмет көрсету орталығындағы және оның жанында тұрған 11 көлік бүлінді. Таңғы сағат 4-тен бастап күзетшіні іздестіру жұмыстары жүргізілді. Таңғы уақытта иттердің көмегімен адам жатқан жер анықталды. Дене бетон арасынан шығарылды,- дейді облыстық ТЖД бастығының орынбасары Қайрат Қасым.

Алдын ала болжам бойынша, көліктегі газ балоны құрылғысынан газ шыққан.

Оқиға орнында 136 адам мен 16 техника жұмыс істеді. ҚР ҚК-нің 292-бабы 2-бөлігі «өрт қауіпсіздігі талаптарын бұзу» бойынша сотқа дейінгі тергеу басталды.

Ардақ Ерубаева, Ақтөбе қаласы