Ақтөбеде қаңтар оқиғасына қатысқан 20 адам қамауда отыр

Ақтөбелік прокурорлар 14 қылмыстық іс бойынша тергеу жүріп жатқанын хабарлады.

Оның екеуі терроризм бабымен. 

Құқық қорғау қызметкерлерінің мәліметінше, қаңтар оқиғасы кезінде құқықтық тәртіпті қамтамасыз еткен 31 маман түрлі дәрежедегі дене жарақатын алған. Прокурорлар бүлінген қызметтік көліктер мен зақымданған арнайы құралдарға объективті құқықтық баға берілетінін хабарлады. 

«Ұйымдастырушылар полицейлерге қатысты зорлық - зомбылықты қолдана отырып, облыс әкімдігі ғимаратын басып алып, мемлекеттік мүлікті бүлдіру арқылы 230 млн.теңге шығын келтірді. Ақтөбе қаласы әуежайының жұмысы бұғатталды, әуе қатынасы тоқтатылды. Арандатушылардың ықпалымен заңсыз акциялар облыстың  Әйтеке би, Хромтау, Темір және Мұғалжар аудандарында өтті»  деп хабарлайды Ақтөбе облысының прокуратурасы.

Аталған қылмыстарға күдікті деп танылған 12 адам изоляторда,  8 адам үй қамауында отыр.

Сонымен қатар, сыбайлас жемқорлыққа қарсы қызмет полиция қызметкерлерінің тергеудің рұқсат етілмеген әдістерін қолдануы бойынша 4 сотқа дейінгі тергеу жүргізуде, барлық істер бойынша процессуалдық прокурорлар тағайындалды.

Авторы : Ардақ Ерубаева, Ақтөбе облысы