Ақтөбеде 41 жастағы ер адам оқушы қызбен жыныстық қатынасқа түсті

Даулы іс бойынша үкімді Ақтөбе соты шығарды. 41 жастағы қала тұрғыны кәмелетке толмаған баламен жыныстық қарым-қатынаста болғаны үшін 14 жылға бас бостандығынан айрылды, деп хабарлады «Астана» телеарнасы.

Оның үстіне ер адам он бес жасар қызға АҚТҚ (адамның қорғаныш тапшылығының қоздырғышы немесе ВИЧ – Ескерту ORDA) жұқтырған. Тергеу оның ауруы туралы білетіндігін және сонымен қатар екі жыл бойы жәбірленушімен интимдік қатынасқа түскенін анықтады.

Бірден екі бап бойынша қылмыстық іс қозғалды. Жабық сот отырысы кезінде сотталушы өз кінәсін толығымен мойындады.

Сот үкімімен ол ҚР Қылмыстық кодексінің 118-бабы, 3-бөлігі, 122-бабы, төртінші бөлігінде көзделген қылмыстарды жасағаны үшін кінәлі деп танылды. Оған 14 жылға бас бостандығынан айыру жазасы тағайындалды.