Ақтөбеде 4-5 жастағы үш қыз бала суға батып кетті

Үлкендердің қарауынсыз ойнаған балалар ауылдан бір шақырым жердегі өзен жағасына барған. Қайғылы оқиға Ақтөбе облысы Ырғыз ауданы Ақши ауылында болды.

4 маусым күні сағат 19:00 шамасында ТЖД-нің кезекші бөліміне үш баланың өзенге батып кеткені туралы қоңырау түскен. Ырғыз өзеніне батып кеткен балаларды ауыл тұрғыны алып шыққан.

– Ырғыз өзеніне үш бала суға батып кетті. Алдын ала мәлімет бойынша, 2017 және 2018 жылы туған балалар өзен жағасына ересектердің қарауынсыз барған. Біз ата-аналардан баланы су жағасына жібермеуді және қараусыз қалдырмауды сұраймыз, - дейді ТЖД-нің баспасөз қызметі.

Ауыл тұрғындарының айтуынша, суға кеткен 4 және 5 қыздар апалы-сіңілі, бір үйдің балалары. Үшінші бала 4 жасар көрші үйдің қызы. Балалар көпбалалы отбасында тәрбиеленген. Аналары ауыл мектебінде жұмыс істейді.

Ардақ Ерубаева, Ақтөбе