Ақтөбе әуежайын жөндеуге 69 млн теңгелік тендер жарияланды

Жөндеу жұмыстарына жабылған Ақтөбе әуежайы 69 млн теңгеге аэродром плиталарын мемлекеттік сатып алуға тендер жариялады.

«Тапсырыс беруші – «МААМ» АҚ (Әлия Молдағұлова атындағы халықаралық әуежай); атауы - аэродром төсеміне арналған плита; қосымша сипаттама - PAG-18 пластиналары; біреуінің бағасы – 230 мың теңге; саны - 300 дана; жоспарланған сома – 69 млн теңге» делінген мемлекеттік сатып алу порталында жарияланған лоттың сипаттамасында.

Конкурсқа қатысуға өтінімдерді алдын ала қабылдау 29 наурыз бен 13 сәуір аралығында жүргізіледі.

Еске салсақ, 10 наурызда Ақтөбе әуежайының ұшу-қону жолағында ақаулар анықталған соң екі аптаға жабылуы мүмкін екенін хабарлаған. 12 наурызда ұшу-қону жолағындағы жөндеу жұмыстары кезінде техника істен шығып, сегіз рейс кейінге қалдырылғаны белгілі болды. 15 наурызда Ақтөбе әуежайының бір айға жабылғаны хабарланды. 17 наурызда әуежай әуе компанияларының әуежайдың ұшу-қону жолағын қанағаттанарлық деп санайтынын, алайда ақпараттық соғыс жүріп жатқанын мәлімдеді.