Ақтөбе полициясы «митинг орнында» бақылауды күшейтті

Ақтөбеде 5 маусым күні «митинг өтеді» деген орталық стадион айналасын полиция бақылауға алып, күзетті күшейтті. Оппозиция өкілі Мұхтар Әбіләзов Ақтөбеде сайлау күні сағат 14:00-де стадион алдында митинг өтетінін хабарлаған еді.

Белгіленген уақытта аумаққа полиция көліктері қойылып, 10-15 метр сайын тәртіп сақшылары қос-қостан жүрді. Наразылыққа шыққандар байқалмады. Аялдама жанына қоғамдық көліктері қойылған. Ішінде полиция қызметкерлері отыр.

– Полиция әрдайым жұмыста. Қоғамдық тәртіп күндіз-түні бақыланады, - дейді өзін Тимур Наурызалин деп таныстырған полиция қызметкері.

Сайлау учаскелеріне барып, Конституцияға өзгерістер енгізу жөніндегі референдумда дауыс берушілердің де пікірін білдік. Ақтөбедегі № 68 сайлау учаскесіне келген қала тұрғыны Орал Досанов тіл тағдыры үшін ғана сайлауға келгенін айтты.

– Конституцияда мемлекеттік тіл - қазақ тілі деп қалдырып, орыс тілін алып тастауды сұраймыз. Бүгін референдумға осы тіл тағдыры үшін келдім. Бірақ негізі өзгертуде бұл бапты мүлде қарастырмады. Бұл қазақтың елі. Әлі орыс тілімен тіркесіп жүрміз. АҚШ-та ағылшын, Францияда франсуз тілі ғой. Неге біз екі тілді қатар қолданамыз? Қазақ тілін білмесе үйренсіз, - деді қала тұрғыны Омар Досанов.

Қазіргі уақытта Ақтөбе облысында 517 дауыс беру учаскесі жұмыс істеп тұр. Нұр-Сұлтан уақытымен 16:00-ге дейін тұрғындардың дауыс беру белсенділігі 53, 52 пайызды құрады.

Ардақ Ерубаева, Ақтөбе