Ақтөбе облысының әкімі қауіпсіздігін ойлап, халық алдына шықпады

Ақтөбе облысының әкімі Оңдасын Оразалин жеке қауіпсіздік мәселесіне байланысты шерушілер алдына шықпаған.

Оның бірінші орынбасары Руслан Хамбаров газ бағасын төмендетуді талап еткен шерушілер облыс басшысын, жалпы шенеуніктерді тыңдағысы, көргісі келмегенін түсіндірді.

Мысал ретінде ол Талдықорғандағы тәртіпсіздік кезінде зардап шеккен Алматы облысы әкімінің орынбасары Ләззат Тұрлашовты келтірді. Қазір ол ауруханада, жағдайы тұрақтанған.

«Облыс әкімінің қашып кеткені немесе оның орынбасарларының қорқып кеткені туралы алып-қашпа әңгіме... бұл жерде біріншіден, ешкім тыңдамады, екіншіден, жеке қауіпсіздік деген бар. Ол жерде бір адамды ұрып-соққан болса, бұл жалпы биліктің өте қате әрекеті деп есептеймін. Сені көргісі, тыңдағысы келмейтін адаммен сыртқа шығып сөйлесудің қажеті жоқ» деген Хамбаров Мой город басылымына.