Ақтөбе облысында заңсыз  алкоголь өнімі қолға түсті

Ақтөбеде тәртіп сақшылары сапасы күмәнді спирт толтырылған үш жүк көлігі мен екі фураны  тоқтатты. 53 мыңға жуық бөтелке тәркіленді.

Өндірушілер мен импорттаушылар қауымдастығы қызметкерлерінің күмәні  кезекті сынақтық сатып алу кезінде туған. Оларды QazSpirit алкоголь өнімдері бөтелкелеріндегі акциздік таңбалар сапасының төмендігі алаңдатқан.  Өнім құрамында никотин бар болып шықты.

 «Болжамды растау үшін бірнеше бақылау сатып алулары жүргізілді, кейін өнімдер қала бойынша бірнеше жүк көлігімен тасымалданып жатқаны белгілі болды. Бұл туралы құзырлы органдарға хабарланды. Бүгін құқық қорғау органдары 3 жүк көлігі мен 2 фураны ашты. Алдын ала есептеулер бойынша 53 мыңға жуық бөтелке тәркіленген. Қазіргі уақытта күдікті өнімдерге нақты санақ, жедел-іздестіру шаралары жүргізілуде, сараптамалар тағайындалады»  деп нақтылады сарапшылар.

Ақтөбедегі оқиға Қаржы мониторингі агенттігі мен QazSpirit қауымдастығының бірлескен жұмысының көп эпизодтарының бірі ғана. Соңғы екі айда тек Алматы қаласында шығарылуы күмәнді және акциздік маркалары жоқ алкогольді өнімдерді сататын 163 сауда нүктесі туралы ақпарат жіберілді. Дәл осылай Алматы облысындағы 151 сауда нүктесіне қатысты ақпарат берілді. Сонымен қатар, жыл басынан бері еліміздің әр өңірінде заңсыз алкоголь өнімдерін шығаратын бірнеше цехтар анықталды.

Мұндай күрделі жұмыс QazSpirits, «КазАлкоТабак», Қазақстан Республикасы Қаржы министрлігі Мемлекеттік кірістер комитетінің бірлескен күш-жігерінің арқасында мүмкін болды. Бөлімшелер алкоголь өнімінің заңсыз айналымына қарсы бірлесіп күресу туралы меморандум жасасты.  Бұл ретте өндірушілер, дистрибьюторлар және тұтынушылар заңсыз өнімді өткізу және өндіру фактілерін анықтау туралы келісімге келді.

Мемлекеттік кірістер комитетінің мәліметінше, үстіміздегі жылдың 5 айында салықтық тексерулер, құқық қорғау органдарымен бірлескен жедел іс-шаралар арқылы алкоголь өнімдерінің заңсыз айналымын анықтау және жолын кесу бойынша жүйелі жұмыстың арқасында мемлекеттік бюджетке 38,7 млрд теңге акциздер түсті. Бұл өткен жылдың сәйкес кезеңімен салыстырғанда екі есе дерлік көп. Рұқсаты жоқ  829,2 мың литр заңсыз алкоголь өнімі тәркіленді.