Ақтөбе облысында өрттен 5 жасар егіздер қаза тапты

Ақтөбе облысы Қобды ауданы Қызылжар ауылында өрттен 5 жастағы егіздер қайтыс болды.

Ақтөбе облысының Төтенше жағдайлар департаментінің мәліметі бойынша, 2022 жылдың 3 ақпанында жеке тұрғын үй өртенген, өрт аумағы 8 шаршы метрді құрады.

– Өрт сөндіру қызметкерлері келгенге дейін ерікті өрт сөндіру бөлімшелерінің күштері өртті сөндірді. Жақын маңдағы өрт сөндіру бекетіне дейінгі қашықтық 80 шақырым. Үйде 2017 жылы туған егіздер бар, олар көмірқышқыл газынан уланып қайтыс болған. Өрт кезінде ата-анасы жұмыста болған, - деп хабарлады ведомстводан.

Өрттің алдын ала себебі электр сымдарының тұйықталуы болып шықты.

– Құрметті облыс тұрғындары мен қонақтары, Ақтөбе облысының Төтенше жағдайлар департаменті күнделікті өмірде өрт қауіпсіздігі ережелерін қатаң сақтауларыңызды және мүмкіндігінше балаларды ересектердің қарауынсыз қалдырмауларыңызды сұрайды. Өрт болған жағдайда дереу 101 немесе 112 нөміріне қоңырау шалыңыз, - деп қорытындылады өрт сөндірушілер.