Ақтөбе облысында мұнайшылар тағы ереуілге шықты

Ақтөбе облысында  Көкжиде мұнайшылары ереуілінің жалғасып жатқанына 5 күн болғанда осы ауылға жапсарлас жатқан өзге бір кеніштің мұнайшылары ереуілге шықты.  29 қаңтар күні  түсте Бәшенкөл кенішінде «АМК-Мұнай» компаниясының 60-тан астам кеншісі жұмысқа шығудан бас тартты. Бұл туралы Азаттық хабарлады.

Бұл  мұнайшылар да жалақыларын 100 пайызға көтеруді талап етуде. Олар тілшіге 67 мың теңге айлық алатындарын, мардымсыз жалақының ештеңеге жетпейтінін, азық-түлік  қымбат екенін айтып шағымданған. Олардың айтуынша, операторлардың  жалақысы - 67-70 мың, көлік жүргізушілердің айлығы - 100 мың, супервайзерлердікі -140 мың теңге екен.

Олар былтырғы наурыз айынан бері осы мәселені айтып жүргендіктерін, көрші Көкжидеде осы мәселе көтерілгеннен кейін еңбек инспекциясына шағымданғандарын, олардан «жалақы мәселесі жұмыс беруші мен жұмысшы арасындағы ұжымдық келісім-шарт негізінде шешіледі» деген сырғытпа жауап алғандарын, сол себепті жұмысты тоқтатып, ереуілге шығуға мәжбүр болып отырғандықтарын жеткізді.

«АМК-Мұнай» компаниясының басшысы Ержан Қолдасов Азаттық тілшісіне «жұмыстың тоқтағанын»  жоққа шығарып, «жұмысшылар талап қойып отыр, оны әлі талқылаймыз. Сол жаққа барамыз»,  деп қысқа жауап берген.

Жұмысшылардың сөзінше жұма күні кеніштегі ереуілшілерге Ақтөбе қаласынан тағы 40 жұмысшы келіп қосылуы тиіс болған. Бірақ Темір елді мекеніне келгенде жұмыс берушілер оларды кері қайтарған. Осы топқа  қосыла алмай қалғандардың бір бөлігі 29 қаңтарда түстен кейін компанияның Ақтөбедегі кеңсесінің алдына жиналып, талаптарын айтқан.

«АМК-Мұнай» компаниясы «Ада Ойл» компаниясының тапсырысы бойынша мұнай өндіреді. Жергілікті әкімдік әзірге оқиғаға түсініктеме бермеді.