Ақсудағы қарттар үйінде жаппай covid-19 инфекциясы таралып отыр

Коронавирус инфекциясының таралуынан көш бастаушы Павлодар облысында тәулігіне 100 науқас тіркеліп, нәтижесінде кезекші сыныптар қашықтан оқу үрдісіне көшті.

Бүгін Павлодар облысының карантин құрсауында отырғандарына бір ай толып отыр. Індеттің асқынуы Ақсудағы қарттар үйінде де белең алды. Барлық сақтық шаралары жүзеге асып жатқанымен, оң нәтиже көрсетпей отыр. Қалада ірі сауда үйлері, базарлар мен мәдениет ошақтарының жұмысына шектеу қойылған. Оған қоса сенбі, жексенбі күндері қалада қоғамдық көліктер жүрмейді. Карантин талаптарының сақталуын арнайы мониторингтік топтар қадағалайды. Коронавирус жұқтырғандардың саны жеті мыңнан асып кетсе де, дәрі-дәрмек тапшылығы орын алған жоқ. Күрделі кезеңде жиын-той, мерекелік отырыстарға тыйым салынған.

Денсаулық сақтау басқармасының стратегиялық дамыту және инновациялық даму бөлімі басшысы Ерғалы Асылбек:

«Егер қызыл аймаққа кірген облыстарды алатын болсақ, ахуалдың күшеюін солтүстік аймақтағы облыстардың климаты суықтығы мен Ресеймен шекаралас болуымен байланыстырады. Осы уақытқа дейін қанша адамның елімізге коронавирус инфекциясымен кіргені белгісіз. Коронавирус инфекциясы – ұзақ емделеді. Оның симптомдары бірден емес, екі-үш аптадан кейін байқала бастайды. Осы уақыт аралғында жұқтырған адам басқа адамдармен байланыста болады».