АҚШ және Қытай басшылары жарты жылдан кейін телефон арқылы тілдесті

АҚШ және Қытай басшылары жеті ай ішінде алғашқы рет телефонмен сөйлесті. Әлем экономикасында жетекші орынға ие екі ел арасындағы қарым-қатынас барысы көптеген мәселе мен дауларға қатысты ушығып тұр.

Бұл туралы  Orda.kz   Азаттықа сілтеп хабарлады.

АҚШ президенті Джо Байден мен Қытай басшысы Си Цзиньпин «терең, стратегиялық мәселелер бойынша пікір алмасты, оның барысында екі ел мүддесі тоғысатын салалар, сонымен бірге тараптардың мүдделері мен құндылықтары сәйкес келмейтін мәселелер де талқыланды» делінген Ақ үй хабарламасында.

Вашингтон мен Пекин арасындағы жағдайдың бірнеше жылдан бері ушығуы басқа жағдайлармен  қатар сауда, киберқауіпсіздік, адам құқығы, оның ішінде Шыңжаңда түркі тілді халықтардың қудалануы мәселелері де бар.

Сонымен қатар  АҚШ Пекинді алғаш Қытайда тіркелген коронавирустың пайда болу себебін зерттеуде ашықтық танытпады деп те сынады. Сонлай-ақ АҚШ Пекиннің Тайвань және Оңтүстік Қытай теңізіндегі территориялық даулардағы саясатына наразы.

Екі ел әріптестік орната алуы мүмкін салаларға ғаламдық жылынумен күрес, Корея түбегіндегі ядролық дағдарыстың алдын алу, ғаламдық экономика тұрақтылығы мәселелері жатады. Ақ үй Джо Байден АҚШ екі ел арасында қақтығысқа ұласып кетпейтіндей дені дұрыс, жауапты бәсеке болғанын қалайтынын мәлімдеген.

Қытайдың CCTV мемлекеттік арнасының келіссөз бойынша таратқан хабарламасына қарағанда, Си Цзиньпин Джо Байденге Вашингтон әрекетінің салдарынан «елеулі қиындықтарға» тап болғанын жасырмаған. Мемлекеттік БАҚ Си Цзиньпин «дұрыс қарым-қатынас әлемнің болашағы мен тағдыры үшін өте маңызды» деп айтқанын да атап өткен.