АҚШ өз азаматтарын Украинадан кетуге шақырды

Киевтегі АҚШ елшілігі  қауіпсіздік жағдайына  байланысты америкалық азаматтарды Украинадан кетуге шақырды.

Дипломатиялық миссия  азаматтарына  кетуге болатын елдердің тізімін жариялады, деп жазады РИА Новости.

«Ресей тарапынан әскери әрекет ету қаупін болжау мүмкін емес. Жағдай кез-келген уақытта,  ешбір ескертусіз ұшығып кетуі мүмкін», - деді елшілік.

АҚШ өз азаматтарына Украина аумағынан Польша, Словакия, Венгрия, Румыния және Молдова сияқты елдерге кетуге кеңес берді. Америкалық дипломаттар өз азаматтарына Приднестровье арқылы Молдоваға кірмеуді ұсынып отыр.  Олай болған жағдайда дипломатиялық миссияның «көмегі шектеулі» болып,  азаматтарға толық көмек көрсете алмайтындығы ескертілді.

Сонымен қатар, дипломатиялық өкілдік қазіргі уақытта Америка Құрама Штаттарына коммерциялық рейске билет сатып ала алмайтын америкалықтарға несие беретіндігін  хабарланды.

АҚШ Ресей-Украина шекарасындағы қақтығыстың күшеюі мүмкін деп болжап, кейбір дипломаттар мен олардың отбасыларына Украинадан кетуге рұқсат берді.

Америка билігі  Украинада жүрген отандастарына да  елден кету мүмкіндігін қарастыруды ұсынып жатыр. Жапон билігі де өз азаматтарын Украинадан тез арада кетуге шақырды.